សិង្ហបុរី​ក្លាយ​ជា​ប្រទេស​ដំបូង​​ មាន​តាក់ស៊ី​បើក​អត់​តៃកុង​

សិង្ហបុរី​បាន​ក្លាយ​ជា​ប្រទេស​ដំបូង​គេ​បង្អស់ ​ដែល​​​បង្កើត​តាក់ស៊ី​បើក​​ដោយ​គ្មាន​អ្នក​បញ្ជាឲ្យ​ប្រើ​ប្រាស់​ជា​សាធារណៈ។

 

សិង្ហបុរី​ក្លាយ​ជា​ប្រទេស​ដំបូង​​ មាន​តាក់ស៊ី​បើក​អត់​តៃកុង​

 

តាក់ស៊ី​ទំនើប​នេះ​បង្កើត​ឡើង​ដោយ​ក្រុមហ៊ុន​ ​nuTonomy ដែល​បច្ចុប្បន្ន​បង្កើត​បាន​ ៦ គ្រឿង​ ហើយ​មួយ​គ្រឿងៗ​សុទ្ធ​តែ​អាច​​ដឹក​ជញ្ជូន​ភ្ញៀវ​ដោយ​ស្វ័យ​ប្រវត្តិ​ទៅ​កាន់​គោលដៅ​​ណា​មួយ។ ដំណឹង​​នេះ​ស្ដាប់​ទៅ​ដូច​ជា​អស្ចារ្យ​ណាស់​ ​ប៉ុន្តែ​តាម​ពិត​មាន​ចំណុច​កំណត់​មួយ​ចំនួន។

 

រថយន្ត​បើក​អត់​មនុស្ស​ម៉ូដែល​ Mitsubishi i-Mievs និង​ Renault Zoes នេះ​ អាច​ធ្វើ​ដំណើរ​​ត្រឹម​​តំបន់​ទំហំ​​ ៦,៥ គីឡូម៉ែត្រ​ការ៉េ​ នា​ប្រទេស​សិង្ហបុរី​ប៉ុណ្ណោះ ហើយ​​​មាន​ជា​តំបន់​ពិសេស​សម្រាប់​ទទួល​ភ្ញៀវ​ និង​ ទម្លាក់​ភ្ញៀវ។ មិន​តែ​ប៉ុណ្ណោះ​ ដោយ​សារ​នេះ​ជា​ដំណាក់កាល​សាក​ល្បង​ ហេតុ​នេះ​តាក់ស៊ី​នីមួយៗ​មាន​ផ្ទុក​តៃកុង​ឡាន​ម្នាក់ រួម​ជា​មួយ​អ្នក​ស្រាវជ្រាវ​ម្នាក់​ ដើម្បី​ប្រមូល​ទិន្នន័យ​ទាក់​ទង​ នឹង​ Systems។

 

អ្វី​ដែល​ជា​ដំណឹង​ល្អ​នោះ​គឺ​ថា​អ្នក​ដំណើរ​ទាំង​អស់​ដែល​មាន​សំណាង​​ប្រើ​សេវាកម្ម​នេះ​នឹង​អាច​ធ្វើ​ដំណើរ​ដោយ​មិន​បាច់​ចំណាយ​ប្រាក់​ឡើយ សម្រាប់​ដំណាក់​កាល​សាក​ល្បង។ ក្រុមហ៊ុន​ ​nuTonomy រំពឹង​ថា​​ នៅ​ឆ្នាំ​ ២០១៨ សេវាកម្ម​តាក់ស៊ី​បើកបរ​ដោយ​គ្មាន​មនុស្ស​​នេះ​ នឹង​អាច​ដំណើរ​ការ​ជា​ផ្លូវ​ការ​ ដើម្បី​​ជួយ​កាត់​បន្ថយ​ចំនួន​រថយន្ត​ចរាចរណ៍​លើ​ដង​ផ្លូវ​​នៅ​សិង្ហបុរី៕​

 

​​​​​​​​​​​
ចុច​អាន៖ កុំព្យូទ័រ​ដំបូង​របស់​ Apple លក់​បាន​តម្លៃជាង ៨០មឺុន ដុល្លារ

 

ប្រែ​សម្រួល៖ ហៃ​ សុខ​ហេង
ប្រភព៖ ScienceAlert​