មន្ដ្រីអាស៊ានធ្វើទស្សនកិច្ចស្វែងយល់នៅមន្ទីរពេទ្យបង្អែកខេត្តសៀមរាប

ខេត្តសៀមរាប៖នៅក្នុងឱកាសដែលមកជួបប្រជុំគ្នានៅខេត្តសៀមរាបស្តីពីវិស័យសុខាភិបាលនៅក្នុងតំបន់អាស៊ានកាលពីរសៀលថ្ងៃទី១១​ខែតុ​លាម្សិលម៉ិញនេះ ថ្នាក់ដឹកនំាវិស័យសុខាភិបាលនៃបណ្តាប្រទេសជាសមាជិកអាស៊ានបានមកធ្វើទស្សនកិច្ចស្វែងយល់ និងពិនិត្យមើលជាក់ស្តែងអំពីការផ្តល់សេវាសុខភាពជូនប្រជាពលរដ្ឋកម្ពុជានៅមន្ទីរពេទ្យបង្អែកខេត្តសៀមរាប។
លោក ប៉ែន ផលគុណ ប្រធានមន្ទីរពេទ្យបង្អែកខេត្តសៀមរាបបានឲ្យដឹកថា៖ មន្ទីរពេទ្យបង្អែកខេត្តសៀមរាបជាមន្ទីរពេទ្យមួយដែលមានការផ្តល់សេវាសុខភាពជូនប្រជាពលរដ្ឋបានទូលំទូលាយជាងគេនៅក្នុងចំណោមបណ្តាមន្ទីរពេទ្យបង្អែកនៃបណ្តាខេត្តនៅជិតខាង។អ្វីដែលមន្ទីរពេទ្យបង្អែកខេត្តសៀមរាបមាន ហើយមន្ទីរពេទ្យបង្អែកខេត្តជិតខាងមិនទាន់មាន គឺការវរះកាត់ដោយប្រើប្រាស់ឧបករណ៍ទំនើបៗ មានមជ្ឈមណ្ឌលផ្តល់ឈាម ដែលអាចជួយសង្គ្រោះអ្នកជំងឺធ្ងន់ៗបានទាន់ពេលវេលា។ដែលកត្តាទំាងនេះបានធ្វើឲ្យប្រជាពលរដ្ឋមិនត្រឹមតែនៅក្នុងខេត្តសៀមរាបទេ គឺប្រជាពលរដ្ឋដែលនៅតាមបណ្តាខេត្តជិតខាងក៍មកទទួលសេវាព្យាបាលនៅក្នុងមន្ទីរពេទ្យបង្អែកខេត្តសៀមរាបនេះដែរ។
លោក ប៉ែន ផលគុណ បានបន្តថា៖” បច្ចុប្បន្ននេះមន្ទីរពេទ្យបង្អែកខេត្តសៀមរាបមានគ្រែសម្រាប់អ្នកជំងឺសំរាកព្យាបាលចំនួន៣០០គ្រែ ប៉ុន្តែសម្រាប់អ្នកជំងឺមកសំរាកព្យាបាលជំងឺគឺច្រើនលើសចំនួនគ្រែ ដែលធ្វើឲ្យអ្នកជំងឺខ្លះត្រូវដេក និងការ៉ូ”។លោកបន្តថា រាជរដ្ឋាភិបាលកំពុងតែគិតលើបញ្ហានេះ ដោយគ្រោងសាងសង់គារ និងបន្ថែមគ្រែសម្រាប់អ្នកជំងឺឲ្យដល់ចំនួន៥០០គ្រែនាពេលខាងមុខ។
ក្រុមថ្នាក់ដឹកនំាវិស័យសុខាភិបាលនៃបណ្តាប្រទេសជាសមាជិកអាស៊ានដែលបានធ្វើទស្សនកិច្ចស្វែងយល់នៅមន្ទីរពេទ្យបង្អែកខេត្តសៀមរាបនេះ បានសម្តែងការកោតសសើរចំពោះការផ្តល់សេវាសុខភាពជូនប្រជាពលរដ្ឋ ជាពិសេសគឺការផ្តល់សេវាសុខភាពជូនប្រជាពលរដ្ឋក្រីក្រដោយមិនគិតថ្លៃ ហើយមានគុណភាព ដែលនេះគឺជាចំណុចដែលថ្នាក់ដឹកនំាវិស័យសុខាភិបាលនៃបណ្តាប្រទេសជាសមាជិកអាស៊ានចង់បាន៕

មន្ដ្រីអាស៊ានធ្វើទស្សនកិច្ចស្វែងយល់នៅមន្ទីរពេទ្យបង្អែកខេត្តសៀមរាប

មន្ត្រីជំនាញកាំកុងត្រូលខេត្តកំពង់ធំ រកឃើញផលិតខូចគុណភាពមួយចំនួន

ខេត្តកំពង់ធំ ៖ សមត្ថកិច្ចជំនាញសាខាកាំកុងត្រូលខេត្តកំពង់ធំ នៃអគ្គនាយកដ្ឋានកាំកុងត្រូលរួមសហការជាមួយកម្លាំងមន្ទីរពាណិជ្ជកម្ម បន្តប្រតិបត្តិការចុះពិនិត្យចំណីអាហារនៅកន្លែងតាំងពិពណ៍ស្តាតចាស់និងនៅក្នុងផ្សារ សណ្តាន់ ឃុំសណ្តាន់ ស្រុកសណ្តាន់ ខេត្តកំពង់ធំ! ជាលទ្ធផលបានដកហូត ផលិតផលខូចគុណភាពចំនួន៥មុខយកទៅកំទេចចោល។

លោក លៀងសុភា ប្រធានសាខាកាំកុងត្រូលខេត្តកំពង់ធំបានបញ្ជាក់ថា! នៅល្ងាចថ្ងៃទី០១ខែតុលា កម្លាំងសាខាកាំកុងត្រូល បានសហការជាមួយមន្ទីរពាណិជ្ជកម្មខេត្ត ចុះត្រួតពិនិត្យនៅកន្លែងតាំងពិពណ៍ ក្នុងបរិវេណស្តាតចាស់ សង្កាត់ព្រៃតាំហ៊ូ ក្រុងស្ទឹងសែន ខេត្តកំពង់ធំ!ដោយបានធ្វើការណែនាំដល់ក្រុមអាជីវករថៃ បញ្ឈប់ការនាំយកផលិតផលហួសសុពលភាពយកមកដាក់លក់នៅកន្លែងដាក់តាំងពិពណ៍នានា ក្នុងប្រទេសកម្ពុជា ពីថាព្រោះកន្លងមកនេះសមត្ថកិច្ចបានចុះឆែករកឃើញ មានចំណីអាហារ១ចំនួនខូចគុណភាពដាក់នៅកន្លែងពិពណ៍
បន្ទាប់មកនៅព្រឹកថ្ងៃទី២ខែតុលាឆ្នាំ២០១៧នេះកម្លាំងជំនាញកាំកុងត្រូលបានបន្តចុះពីនិត្យនៅជុំវិញផ្សារសណ្តាន់ ស្រុកសណ្តាន់ កំពង់ធំ បានឆែករកឃើញផលិតផលខូចគុណភាព៥មុខ មានដូចជាទឹកដោះ គោ ចំនួន២៦ដប ប័រចំនួន១០កំប៉ុង ទឹកក្រូចម៉ាកប៊ិចចំនួន៣ដបធំ!ដែលផលិតនៅប្រទេសថៃ និងមី ម៉ាម៉ា ចំនួន៧០កំប៉ុង ផលិតនៅកម្ពុជា ព្រមទាំងធ្វើការបិទផូស្ទ័រ អប់រំពន្យល់ណែនាំ ដល់អាជីវករ អោយចេះទុកដាក់ ពី របៀប មានអនាម័យ និងចេះមើលការបរិច្ឆេត ផលិតផលពិតនិងក្លែងក្លាយ។
ជាមួយគ្នានេះប្រជាពលរដ្ឋបានសាទរចំពោះការខិតខំយកចិត្តទុកដាក់ របស់មន្ត្រីសមត្ថកិច្ចកាំកុងត្រូល តែងតែចុះពិនិត្យជាប្រចាំ ដើម្បីការពារផលប៉ះពាល់សុខមាភាពបងប្អូនពលរដ្ឋ៕

មន្ត្រីជំនាញកាំកុងត្រូលខេត្តកំពង់ធំ រកឃើញផលិតខូចគុណភាពមួយចំនួន

សម្ដេចសខេងចូលរួមពិធីកំទេចផលិតផលក្លែងក្លាយជាង៦០តោន

ភ្នំពេញ៖នៅព្រឹកនេះសម្ដេចសខេងរដ្ឋមន្ដ្រីក្រសួងមហាផ្ទៃបានចូលរួមជាអធិបតីក្នុងពិធីកំទេចផលិតផលក្លែងក្លាយជាង៦០តោនដែលបានរឹបអូសនិងនាំចូលខុសច្បាប់។ក្នុងពិធីកំទេច ទីចាក់សំរាមបឹងជើងឯកសម្ដេចបានបន្ដអំពាវនាវអោយអាជ្ញាធរត្រូវបន្ដបង្ក្រាបនិងបំផ្លាញចោលផលិតផលក្លែងក្លាយនិងគ្រឿងសំអាងដែលប៉ះពាល់ដល់សុខភាពពលរដ្ឋនិងសុវត្ថិភាពសង្គមជាតិ។
ការចាប់ផលិតផលសំអាងក្លែងក្លាយនេះ លោក មៀច សុផាន់ណា ប្រធានគណៈកម្មាធិការបង្រ្កាបផលិតផលក្លែងក្លាយ បានលើកឡើងថា៖” ផលិតផលសំអាងក្លែងក្លាយគឺបង្រ្កាបពីឈ្នួញនាំចូល និងផលិតក្នុងស្រុកតាំងពីខែឧសភាកន្លងមក”៕

សម្ដេចសខេងចូលរួមពិធីកំទេចផលិតផលក្លែងក្លាយជាង៦០តោន

អ្វីទៅហៅថា៖"ជំងឺវង្វេង Dementia"

ភ្នំពេញ៖ជំងឺវង្វេងគឺជាជម្ងឺដែលមានការខូចខាតក្នុងការចងចាំការគិត អាកប្បកិរិយា និងសមត្ថភាពក្នុងការធ្វើសកម្មភាពប្រចាំថ្ងៃ។ទោះបីជាជំងឺវង្វេងច្រើនកើតមានលើមនុស្សចាស់ក៏ដោយ វាក៏អាចកើតលើមនុស្សអាយុក្រោម65ឆ្នាំដែរ។ នៅទូទាំងពិភពលោកមនុស្សប្រមាណ 47លាននាក់មានជំងឺវង្វេង ហើយមានជិត10លានករណីជាករណីថ្មីជារៀងរាល់ឆ្នាំ។ ជំងឺអាល់ហ្សៃមឺរ (Alzeimer) គឺជាជំងឺវង្វេងម្យ៉ាងរួមចំណែកដល់ទៅ60-70% នៃករណីជំងឺវង្វេងទាំងអស់។ជំងឺវង្វេងគឺជាមូលហេតុចម្បងមួយនៃពិការភាពនិងការពឹងផ្អែកនៃមនុស្សចាស់ទូទាំងពិភពលោកទៅលើអ្នកជួយថែទាំ ក្រុមគ្រួសារ និងសង្គម ។ ជំងឺវង្វេងមានឥទ្ធិពលលើរូបរាងកាយ ផ្លូវចិត្ត ផ្លូវសង្គម និងសេដ្ឋកិច្ច។
កត្តាហានិភ័យនិងការបង្ការ៖
ការស្រាវជ្រាវមួយចំនួនបានបង្ហាញពីទំនាក់ទំនងរវាងការវិវត្តនៃការវង្វេងនិងកត្តាហានិភ័យទាក់ទងនឹងស្ថានភាពរស់នៅ។ កត្តាហានិភ័យទាំងនេះរួមមានអសកម្មរាងកាយ របបអាហារគ្មានតុល្យភាព ការប្រើប្រាស់ថ្នាំជក ការប្រើប្រាស់គ្រឿងស្រវឹង ជំងឺទឹកនោមផ្អែម និងការឡើងសម្ពាធឈាមក្នុងវ័យកណ្តាល។កត្តាហានិភ័យផ្សេងទៀតរួមមានការធ្លាក់ទឹកចិត្ត ការទទួលបានការអប់រំទាប ភាពឯកោខាងសង្គម និងអសកម្មភាពនៃការចង់ចេះចង់់ដឹង។
ការព្យាបាលនិងការថែទាំ៖
ក្នុងពេលបច្ចុប្បន្ននេះ មិនមានការព្យាបាលណាសម្រាប់ជំងឺវង្វេងឡើយ។ ការព្យាបាលជាច្រើនកំពុងស្ថិតក្នុងដំណាក់កាលធ្វើតេស្តនៅឡើយ។ទោះជាយ៉ាងណាក៏ដោយ មានការខឹតខំជាច្រើនត្រូវបានគេធ្វើដើម្បីជួយកែរលម្អជីវិតរស់នៅរបស់អ្នកដែលមានជំងឺវង្វេងនិងអ្នកថែទាំនិងគ្រួសាររបស់ពួកគេ។ គោលការណ៍សំខាន់ៗសម្រាប់ការថែទាំជំងឺវង្វេងគឺ:
– ការធ្វើរោគវិនិច្ឆ័យឲ្យទាន់ពេលដើម្បីលើកកម្ពស់ការគ្រប់គ្រងលើអកប្បកិរិយានិងបញ្ហាសុខភាពទូទៅរបស់អ្នកមានជំងឺវង្វេង
– ការតាមដាននិងផ្តល់ព័ត៌មានសម្រាប់ការថែទាំរយៈពេលយូរដល់អ្នកថែទាំ៕អត្ថបទ៖វេជ្ជបណ្ឌីត៖ឡុងឈុន

អ្វីទៅហៅថា៖"ជំងឺវង្វេង Dementia"

ក្រសួងអប់រំគ្រោងនឹងដាក់បញ្ចូលការបរិច្ចាគឈាមទៅក្នុងកម្មវិធីសិក្សាជាតិ

ភ្នំពេញ៖ក្រសួងអប់រំយុវជននិងកីឡាគ្រោងនឹងដាក់បញ្ចូលការបរិច្ចាគឈាមទៅក្នុងកម្មវិធីសិក្សាជាតិដើម្បីលើកទឹកចិត្តឲ្យមានការបរិច្ចាគឈាមដោយស្ម័គ្រចិត្តនិងមិនគិតកំរ៉ៃ១០០ភាគរយនៅឆ្នាំ២០២០ខាងមុខនេះ។
ថ្លែងក្រោយកម្មវិធីផ្សព្វផ្សាយនិងផ្តល់អំណោយឈាមរបស់បុគ្គលិកអប់រំនៅព្រឹកថ្ងៃទី២៧កញ្ញានៅអគាររដ្ឋបាលពញាហុកក្រសួងអប់រំឯកឧត្តម ហង់ ជួនណារ៉ុន រដ្ឋមន្ត្រីក្រសួងអប់រំយុវជននិងកីឡាបានមានប្រសាសន៍ថាការដាក់បញ្ចូលនូវគោលការណ៍សំខាន់ៗនៃការបរិច្ចាគឈាមទៅក្នុងកម្មវិធីសិក្សានេះគឺដើម្បីបង្កើនចំណេះដឹងស្តីពីសារៈសំខាន់នៃការផ្តល់ឈាមដល់សិស្សនិស្សិតឲ្យចូលរួមបរិច្ចាគឈាមឲ្យកាន់តែផុលផុសថែមទៀតខណៈបច្ចុប្បន្នការបរិច្ចាគឈាមដោយស្ម័គ្រចិត្តនៅមានកំរិតនៅឡើយ។
ឯកឧត្តមបានបញ្ជាក់ថាកម្មវិធីបរិច្ចាគឈាមនេះនឹងជួយជំរុញឲ្យសិស្សនិស្សិតកាន់តែមានភាពក្លាហានថែមទៀតក្នុងការចូលរួមបរិច្ចាគឈាមដើម្បីជួយសង្គ្រោះដល់ជនរងគ្រោះដែលត្រូវការឈាមជាចាំបាច់ ។ចំណែកលោកវេជ្ជបណ្ឌិត ហុក គឹមចេង ប្រធានមជ្ឈមណ្ឌលជាតិផ្តល់ឈាមបានមានប្រសាសន៍ថានាពេលឆាប់ៗនេះមជ្ឈមណ្ឌលជាតិផ្តល់ឈាមនឹងរៀបចំឯកសារដើម្បីធ្វើការពិគ្រោះយោបល់ជាមួយអ្នកជំនាញរបស់ក្រសួងអប់រំដើម្បីដាក់បញ្ចួលគោលការណ៍សំខាន់ៗនៃការបរិច្ចាគឈាមតាមលក្ខណៈវិទ្យាសាស្ត្រនិងវេជ្ជសាស្ត្រទៅក្នុងមុខវិជ្ជាសិក្សាជីវវិទ្យា។
លោកវេជ្ជបណ្ឌិតបានពន្យល់ថាការបរិច្ចាគឈាមមិនមានផលប៉ះពាល់ដល់សុខភាពទេដោយសារឈាមដែលបាត់បង់នោះនឹងកកើតឡើងវិញដោយខ្លួនឯងហើយឈាមដែលបរិច្ចាគនេះក៏ធានាបានប្រកបដោយសុវត្ថិភាពខ្ពស់សម្រាប់ជួយសង្គ្រោះដល់អាយុជីវិតអ្នកជំងឺ។
លោកវេជ្ជបណ្ឌិតបានបន្តថាឈាមដែលទទួលបានពីសប្បុរសជននានាគឺមជ្ឈមណ្ឌលជាតិផ្តល់ឈាមយកទៅជួយសង្គ្រោះអាយុជីវិតអ្នកជំងឺពិសេសអ្នកជំងឺដែលមានការហូរឈាមតាមប្រដាប់រំលាយអាហារ ការវះកាត់ជំងឺបេះ ដូង គ្រោះថ្នាក់ចរាចរណ៍ ករណីនៃការហូរ ឈាមមិនប្រក្រតីនៅមុននិងក្រោយពេលសំរាលកូន ករណីជំងឺខ្សោយតំរង់នោមនិងករណីនៃការព្យាបាលថែទាំ ជំងឺមហារីក។ល។
លោកវេជ្ជបណ្ឌិតបញ្ជាក់ថា៖ការបរិច្ចាគឈាមដោយស្ម័គ្រចិត្តនិងមិនគិតកម្រៃនៅកម្ពុជាបច្ចុប្បន្ននេះមានចំនួនត្រឹមតែ៣​៥ភាគរយប៉ុណ្ណោះចំណែក៦៥ភាគរយទៀតជាការដោះដូរអំ ណោយ ឈាម តាមរយៈសាច់ ញាតិអ្នកជំងឺបរិច្ចាគជំនួស។

រដ្ឋមន្ត្រីក្រសួងសុខាភិបាលអំពាវនាវឲ្យផ្នែកឯកជនបន្តជួយសាងសង់អគារមន្ទីរពេទ្យបន្ថែមទៀតដើម្បីឆ្លើយតបនឹងតំរូវការរបស់ប្រជាពលរដ្ឋ

ភ្នំពេញ៖រដ្ឋមន្ត្រីក្រសួងសុខាភិបាលបានអំពាវនាវឲ្យវិស័យឯកជនបន្តជួយសាងសង់អគារមន្ទីរពេទ្យបន្ថែមទៀតដើម្បីចូលរួមជាមួយរដ្ឋាភិបាលក្នុងការលើកកម្ពស់ដល់សុខភាពរបស់ប្រជាពលរដ្ឋឲ្យកាន់តែប្រសើរឡើង។
ឯកឧត្តមវេជ្ជបណ្ឌិត ម៉ម ប៊ុនហេង រដ្ឋមន្ត្រីក្រសួងសុខាភិបាលបានមានប្រសាសន៍នៅក្នុងពិធីបញ្ចុះបឋមសិលានៅព្រឹកថ្ងៃទី១៣កញ្ញានេះថារហូតមកដល់ពេលនេះវិស័យឯកបានចូលរួមយ៉ាងផលផុសជាមួយរដ្ឋាភិបាលក្នុងកសាងនូវវិស័យសុខាភិបាលនៅទូទាំងប្រទេស។ជាក់ស្តែងនាពេលនេះបានផ្តល់អគារកម្ពស់៣ជាន់ស្ថិតនៅក្នុងមន្ទីរពេទ្យបង្អែកពោធិចិនតុងសម្រាប់ផ្តល់សេវាជួនដល់កម្មករកម្មការិនីរោងចក្រសហគ្រាសនិងប្រជាពលរដ្ឋរស់នៅតំបន់នោះ។
លោកឧញ៉ា សៀរ ឬទ្ធី ដែលជាម្ចាស់ជំនួយបានមានប្រសាសន៍ថាការដែលលោកសម្រេចផ្តល់អគារមន្ទីរពេទ្យនេះដោយសារតែវិស័យសុខាភិបាលគឺជាវិស័យមួយដ៏សំខាន់មួយដែលធ្វើឲ្យសុខុមាលភាពរបស់ប្រជាពលរដ្ឋល្អប្រសើរ។
លោកឧញ៉ាបានបន្តថាប្រសិនបើប្រជាពលរដ្ឋមានសុខភាពល្អនោះអាចរកស៊ីទទួលទានបានហើយប្រទេសជាតិក៏រីកចំរើនទៅតាមហ្នឹងដែរ។
ចំណែកលោកវេជ្ជបណ្ឌិត អ៊ុក ណារិទ្ធ ប្រធានមន្ទីរពេទ្យបង្អែកពោធិ៍ចិនតុងដែលស្ថិតនៅខណ្ឌពោធិសែនជ័យរាជធានីភ្នំពេញសង្ឃឹមថានៅពេលដែលអគារនេះសាងសង់រួចរាល់នោះនឹង អាចឲ្យគ្រូពេទ្យមានកន្លែងធ្វើការនិងអ្នកជំងឺមានកន្លែងសម្រាកព្យាបាលបានសមរម្យមានលទ្ធភាពទទួលអ្នកជំងឺបានច្រើនពិសេសបងប្អូនកម្មករកម្មការិនីមកពីតាមបណ្តារោងចក្រសហគ្រាសនានាខណៈដែលប្រមុខរដ្ឋាភិបាលកំពុងតែយកចិត្តទុកដាក់លើសុខភាពនិងសុខទុក្ខរបស់កម្មករ។
តែយ៉ាងណាក៏ដោយលោកបានបន្ថែមថាមន្ទីរពេទ្យនៅមានការខ្វះខាតអគារច្រើនទៀតដូចជាអគារសម្ភព កុមារនិងអគារវះកាត់និងសម្ភារៈបរិក្ខាពេទ្យមួយចំនួនធំផងដែរ។ គួរបញ្ជាក់ថាអគារដែលបញ្ចុះបឋមសិលានេះមានកម្ពស់៣ជាន់ដោយប្រើពេលសាងសង់រយៈពេល៦ខែហើយគ្រោងនឹងចំណាយថវិកាប្រមាណ៣០ម៉ឺនដុល្លាអាមេរិក៕

សមាគមសហគ្រិនស្ត្រីកម្ពុជាអំពាវនាវដល់ក្រសួងសុខាភិបាលជួយទប់ស្កាត់ផលិតផលគ្រឿងសំអាងក្លែងក្លាយ

ភ្នំពេញ៖សមាគមសហគ្រិនស្ត្រីកម្ពុជាបានអំពាវនាវដល់ក្រសួងសុខាភិបាលជួយទប់ស្កាត់នូវផលិតផលគ្រឿងសំអាងក្លែងក្លាយឬមិនមានស្លាកសញ្ញាត្រឹមត្រូវពិសេសផលិតផលលក់តាមអនឡាញដែលកំពុងផ្សព្វផ្សាយយ៉ាងផលផុសនិងអនា​ធិបតេយ្យនៅតាមបណ្តាញសង្គមហ្វេប៊ុក។
ថ្លែងនៅក្រោយពិធីពិព័រណ៍និងសន្និសីទអន្តរជាតិស្តីពីសម្រស់គ្រឿងសំអាង ផលិត ផល ថែរក្សាសក់ ផលិតផលថែរក្សាស្បែកនិងស៉្បានៅថ្ងៃទី 15 ខែកញ្ញានៅមជ្ឈមណ្ឌលកោះពេជ្រ លោកស្រី អេង លីគង់ សមាជិកក្រុមប្រឹក្សាភិបាលសមាគមសហគ្រិនស្ត្រីកម្ពុជាបានមានប្រសាសន៍ថាការដែលឲ្យក្រសួងសុខាភិបាលជួយទប់ស្កាត់ផលិតផលក្លែងក្លាយឬមិនមានស្លាកសញ្ញាត្រឹមត្រូវនេះគឺដោយសារតែផលិតផលទាំងនោះអាចបង្កផលប៉ះពាល់ដល់សុខភាពស្ត្រីនិងអាចឈានទៅ​ដល់គ្រោះថ្នាក់ដល់អាយុជីវិតអ្នកប្រើប្រាស់ផងដែរ។
លោកស្រីបានបន្តថាផលិតផលគ្រឿងសំអាងក្លែងក្លាយនិងមិនមានស្លាកសញ្ញាត្រឹមត្រូវភាគច្រើនមិនមានការត្រួតពិនិត្យឲ្យបានត្រឹមត្រូវនិងគ្មានការទទួលស្គាល់ពីក្រសួងសុខាភិបាលឡើយដែលធ្វើឲ្យអ្នកប្រើប្រាស់ត្រូវប្រឈមនឹងបញ្ហាសុខភាពដូចជាអាឡាកស៊ីស្បែក ចេញរមាស់ ហើម ខូចភ្នែក មហារីកស្បែកនិងអាចប្រឈមនឹងគ្រោះថ្នាក់ដល់អាយុជីវិតថែមទៀត។
តែយ៉ាងណាក៏ដោយលោកស្រីបានណែនាំដល់ប្រជាពលរដ្ឋគួរតែប្រើប្រាស់ផលិតផលតាមបែបធម្មជាតិវិញធ្វើឲ្យស្បែកមុខស្អាតម៉ត់ល្អជួយលើកសម្រស់ឲ្យកាន់តែស្អាតតែបើចង់ប្រើផលិតផលថែរក្សាសម្ភស្សត្រូវតែទៅរកគ្លីនិកឬកន្លែងណាដែលមានការទទួលស្គាល់ត្រឹមត្រូវពីស្ថាប័នពាក់ព័ន្ធ។
លោកវេជ្ជបណ្ឌិត យាំង ដារ៉ាវុធ អនុប្រធាននាយកដ្ឋានឱសថគ្រឿងសំអាងចំណីអាហានិងបរិក្ខាពេទ្យបានណែនាំដល់ប្រជាពលរដ្ឋមុននឹងទិញផលិតផលគ្រឿងសំអាងណាមួយមកប្រើប្រាស់ប្រជាពលរដ្ឋត្រូវមើលនិងពិនិត្យឲ្យបានច្បាស់លាស់នូវលេខបញ្ជិកាដែលចុះដោយក្រសួងសុខាភិបាលដែលបិទនៅលើប្រអប់និងពិនិត្យមើលថ្ងៃខែប្រើប្រាស់ឲ្យបានច្បាស់លាស់បើហួសការកំណត់ហើយមិនត្រូវទិញទេ។ជាងនេះទៀតត្រូវមកពិគ្រោះយោបល់ជាមួយគ្រូពេទ្យជំនាញផ្នែកសើរស្បែកជាមុនសិនមុននឹងទិញផលិតផលណាមួយយកទៅប្រើប្រាស់។
លោកស្រី ង៉ូយិន ធីឡាំហាដែលជាអ្នករៀបចំពិព័រណ៍និងសន្និសីទអន្តរជាតិស្តីពីសម្រស់គ្រឿងសំអាង ផលិត ផល ថែរក្សាសក់ ផលិតផលថែរក្សាស្បែកនិងស៉្បាដែលចាប់ផ្តើមពីថ្ងៃទី១៥ដល់ថ្ងៃទី១៧កញ្ញានេះបានបញ្ជាក់ថាពិព័រណ៍នេះមានក្រុមហ៊ុនចូលរួមចំនួន80មកពីសហរដ្ឋអាមេរិក, កូរ៉េខាងត្បូង, សិង្ហបុរី, ថៃ, ចិន, ឥណ្ឌា, ម៉ាឡេស៊ី, កម្ពុជា និងវៀតណាម៕

ក្រុមជំនាញអភិរក្សធម្មជាតិ រកឃើញសត្វផ្សោតកម្រចំនួន៣ប្រភេទ ក្នុងដែនសមុទ្រកម្ពុជា

ភ្នំពេញ: ក្រុមអ្នកជំនាញអភិរក្សធម្មជាតិ បានរកឃើញសត្វផ្សោតកម្រចំនួន៣ប្រភេទ កំពុងរស់នៅក្នុងដែនសមុទ្រកម្ពុជា ដែលវត្តមាននេះបានជួយគាទ្រទៅដល់វិស័យទេសចរណ៍នៅតំបន់ឆ្នេរ។
លោក លូ វណ្ណី មន្ត្រីសម្របសម្រួលថ្នាក់ជាតិនៃ អង្គការសហភាពអន្តរជាតិដើម្បីការអភិរក្សធម្មជាតិ ហៅកាត់ថា IUCN ប្រចាំកម្ពុជា នៅថ្ងៃទី៥ ខែកញ្ញានេះ បានប្រាប់ទូរទស្សន៍រស្មីហង្សមាសថា សត្វផ្សោតកម្រចំនួន៣ប្រភេទនេះ មានផ្សោតក្បាលត្រងោល ផ្សោតឃ្លៀច និងផ្សោតអត់ប៊្រុយខ្នង ដែលពួកវា ត្រូវបានប្រទះឃើញ នៅក្នុងដែនសមុទ្រពាមក្រសោម ខេត្តកោះកុង ដោយក្នុងនោះ ១ក្រុម ត្រូវបានប្រទះឃើញមានប្រហែល១០ក្បាល។
លោកបន្តថា ក្រុមអភិរក្សរបស់អង្គការ IUCN កំពុងសហការជាមួយក្រសួងបរិស្ថាន ដើម្បីការ ពារសត្វផ្សោតទាំងនេះពីការគំរាមកំហែង ដោយសារសកម្មភាពមនុស្ស និងអាកាសធាតុ ខណៈពួកវា ត្រូវបានចាត់ទុកថា ជាប្រភេទសត្វកម្រ និងងាយរងគ្រោះ។ លោកមានប្រសាសន៍ថា វត្តមាននៃសត្វផ្សោតទាំងនេះ នឹងទាក់ទាញនូវកំណើនទេសចរចូលទៅកាន់តំបន់អេកូធម្មជាតិ និងឧទ្យានជាតិសមុទ្ររបស់កម្ពុជា កាន់តែច្រើនបន្ថែមទៀត ពិសេសនាំមកនូវចំណូលដល់ប្រជាពលរដ្ឋ ពីវិស័យទេសចរណ៍នៅតំបន់នោះ។ លោកអំពាវនាវឲ្យមានការចូលរួមការពារ អភិរក្ស និងស្តារធនធានធម្មជាតិនៅក្នុងដែនសមុទ្រ និងតំបន់ឆ្នេរ ឲ្យមាននិរន្តភាព ក៏ដូចជាទប់ស្កាត់ បង្ក្រាបបទល្មើសធនធានធម្មជាតិនៅក្នុងសមុទ្រ និងតំបន់ឆ្នេរផងដែរ។
សូមបញ្ជាក់ថា ក្រុមអភិរក្សសមុទ្រ និងតំបន់ឆ្នេររបស់ក្រសួងបរិស្ថាន និងអង្គការ IUCN កាលពីចុងខែសីហាកន្លងទៅនេះ បានធ្វើការផ្សព្វផ្សាយស្តីពីសារៈសំខាន់ធនធានសមុទ្រ តំបន់ឆ្នេរ និងការកំណត់ព្រំប្រទល់ឧទ្យានជាតិសមុទ្រ ក្នុងគោលបំណង លើកកម្ពស់ការយល់ដឹងបន្ថែមពីតម្លៃធានធានសមុទ្រ និងតំបន់ឆ្នេរ ដើម្បីឈានទៅស្នើសុំទៅរាជរដ្ឋាភិបាលពង្រីកសក្តានុពលអភិរក្សឧទ្យានសមុទ្របន្ថែមទៀត។
ឯកឧត្តម សាយ សំអាល់ រដ្ឋមន្ត្រីក្រសួងបរិស្ថាន កាលពីពេលកន្លងទៅនេះ បានឲ្យដឹងថា ក្រសួងបរិស្ថានកំពុងរៀបចំសំណើក្នុងការបង្កើតឧទ្យានសមុទ្រ ការកំណត់ព្រំប្រទល់ ការកំណត់តំបន់គ្រប់គ្រង និងការធ្វើផែនទីសម្រាប់ធនធានសមុទ្រ និងតំបន់ឆ្នេរ ដោយសហការជាមួយស្ថាប័ន អង្គភាពពាក់ព័ន្ធ និងដៃគូអភិវឌ្ឍន៍នានា។
យោងតាមបាយការណ៍ពីក្រសួងបរិស្ថាន បានឲ្យដឹងថា តំបន់ឆ្នេររបស់កម្ពុជា ដែលគ្របដណ្តប់ដោយព្រៃកោកាង ស្មៅសមុទ្រ ផ្កាថ្ម ប្រភេទសត្វកម្រដូចជា ជ្រូកទឹក អណ្តើកសមុទ្រ កន្ធាយសមុទ្រ និងសត្វផ្សោត ជាដើមនេះ គឺជាប្រព័ន្ធអេកូឡូស៊ីដ៏សំខាន់ទាំងខាងបរិស្ថាន ទេសចរណ៍ ការសិក្សាស្រាវជ្រាវផ្នែកវិទ្យាសាស្រ្ត ការរក្សាលំនឹងបរិស្ថានធម្មជាតិ ការស្រូបយកកាបូនពីបរិយាកាស ការលើកកម្ពស់ជីវភាពរស់នៅរបស់ប្រជានេសាទតាមតំបន់ឆ្នេរ និងកំណើនសេដ្ឋកិច្ច៕

 

ក្រុមជំនាញអភិរក្សធម្មជាតិ រកឃើញសត្វផ្សោតកម្រចំនួន៣ប្រភេទ ក្នុងដែនសមុទ្រកម្ពុជា

មន្ទីរពិសោធន៍ចល័ត (Mobile Lab) ផ្នែកប្រេងឥន្ធនៈតម្លៃជាង១៥ម៉ឺនដុល្លារដាក់ដំណើរការ

ភ្នំពេញ៖ ដើម្បីរួមចំណែកការពារអត្ថប្រយោជន៍អ្នកប្រើប្រាស់ប្រេងឥន្ធនៈនៅក្នុងប្រទេសកម្ពុជា នៅព្រឹកថ្ងៃទី៣១ ខែសីហា ឆ្នាំ២០១៧ ក្រសួងពាណិជ្ជកម្ម បានដាក់ឲ្យដំណើរការជាផ្លូវការនូវមន្ទីរពិសោធន៍ចល័ត (Mobile Lab) ផ្នែកប្រេងឥន្ធនៈរបស់អគ្គនាយកដ្ឋានកាំកុងត្រូល ក្រោមអធិបតីភាព ឯកឧត្តម ប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្ម និងមានការចូលរួមពីថ្នាក់ដឹកនាំ និងមន្ត្រីសំខាន់ៗប្រមាណ ៥០រូប។

មន្ទីរពិសោធន៍ចល័ត (Mobile Lab) ផ្នែកប្រេងឥន្ធនៈតម្លៃជាង១៥ម៉ឺនដុល្លារដាក់ដំណើរការ

រថយន្តមន្ទីរពិសោធន៍ចល័តផ្នែកប្រងឥន្ធនៈនេះម៉ាក Ford ម៉ូដែលឆ្នាំ ២០១៦ មានតម្លៃសរុបចំនួន 152,982.49 ដុល្លារអាមេរិក ហើយគឺជារថយន្តទី២ បន្ទាប់ពីរថយន្តមន្ទីរពិសោធន៍ចល័តទី១ ត្រូវបានដាក់ឱ្យដំណើរការ ដើម្បីតាមដាន និងត្រួតពិនិត្យគុណភាព និងសុវត្ថិភាពម្ហូបអាហារ កាលពីចុងឆ្នាំ ២០១៦កន្លងទៅ។

នៅក្នុងឱកាសនោះ ឯកឧត្តម ប៉ាន សូរស័ក្តិ បានគូសបញ្ជាក់ថា ការដាក់ដំណើររថយន្តមន្ទីរពិសោធន៍ចល័តផ្នែកប្រងឥន្ធនៈ សបង្ហាញពីការគិតគូរយកចិត្តទុកដាក់ ប្រកបដោយស្មារតីទទួលខុសត្រូវខ្ពស់ ក្នុងនាមអាជ្ញាធរដែលមានបេសកម្ម និងភារកិច្ចត្រួតពិនិត្យទំនិញនីហរ័ណ-អាហរ័ណ និងបង្ក្រាបអំពើក្លែងបន្លំនៅក្នុងព្រះរាជាណាចក្រកម្ពុជា។ ឯកឧត្តមរដ្ឋមន្ត្រីបានបន្តទៀតថា រថយន្តនេះនឹងជួយពង្រឹងប្រសិទ្ធភាពការងាររបស់មន្ត្រីកាំកុងត្រូល ក្នុងការចុះត្រួតពិនិត្យប្រេងឥន្ធនៈ នៅតាមស្ថានីយ៍ ឬដេប៉ូចែកចាយនៅក្នុងរាជធានី និងតំបន់ឆ្ងាយៗទូទាំងប្រទេស ព្រោះវាមានបំពាក់ដោយឧបករណ៍ទំនើប ដែលអាចវិភាគរកនូវប៉ារ៉ាម៉ែត្រនៃផលិតផលទំនិញជាប្រេងឥន្ធនៈទាំងផ្នែកគុណភាព និងបរិមាណ។

សូមបញ្ជាក់ថា បន្ទាប់ពីដាក់ឲ្យដំណើរការរថយន្តមន្ទីរពិសោធន៍ចល័តផ្នែកប្រងឥន្ធនៈថ្ងៃនេះ មន្ត្រីនៃអគ្គនាយកដ្ឋានកាំកុងត្រូល នឹងចុះត្រួតពិនិត្យគុណភាពប្រេងឥន្ធនៈគ្រប់ប្រភេទដូចជា ប្រេងប្រេងម៉ាស៊ូត, ប្រេងសាំង (ស៊ុបពែរ និងសាំងធម្មតា) និងប្រេងម៉ាស៊ីន នៅតាមស្ថានីយ៍ និងដេប៉ូចែកចាយប្រេងឥន្ធនៈទូទាំងប្រទេស សំដៅធានាភាពជឿជាក់ជូនប្រជាពលរដ្ឋ ក្នុងការទទួលបានទំនិញជាប្រេងឥន្ធនៈប្រកបដោយគុណភាព និងបរិមាណត្រឹមត្រូវ ព្រមទាំងធានានូវការធ្វើធុរកិច្ចប្រកបដោយសមធម៌ និងរក្សាសណ្តាប់ធ្នាប់ទីផ្សារប្រេងឥន្ធនៈនៅកម្ពុជា៕

 

មន្ទីរពិសោធន៍ចល័ត (Mobile Lab) ផ្នែកប្រេងឥន្ធនៈតម្លៃជាង១៥ម៉ឺនដុល្លារដាក់ដំណើរការ

អភិបាលខេត្តអំពាវនាវអោយពលរដ្ឋពន្លឿនការផ្តល់សេវាជូនប្រជាពលរដ្ឋនិងអភិវឌ្ឍមូលដ្ឋាន

ខេត្តកំពង់ធំ៖ថ្នាក់ដឹកនាំខេត្តកំពង់ធំ បានជម្រុញឲ្យអភិបាលនិងអភិបាលរងស្រុក ក្រុង ត្រូវរួមគ្នាថែរក្សាសន្តិភាព ដើម្បីបន្តការអភិវឌ្ឍនៅមូលដ្ឋានខ្លួន និងពន្លឿនការផ្តល់សេវ៉ាជូនប្រជាពលរដ្ឋ ។

ថ្លែងក្នុងពិធីប្រកាសតែងតែងចូលកាន់មុខតំណែង ជាអភិបាលរងស្រុកបារាយណ៏ចំនួន២រូប នៅព្រឹកថ្ងៃទី៣០ខែសីហាឆ្នាំ២០១៧ ដោយបានតែងតំាង លោក សុទ្ធ ម៉ារី នាយផ្នែករដ្ឋបាលព្រៃឈើកំពង់ថ្ម ទៅកាន់ជាអភិបាលរងស្រុកបារាយណ៏និងលោកស្រី ឱក សំណាង មកពីអភិបាលរងស្រុកសន្ទុក! ផ្ទេរមកចូលកាន់តំណែងជាអភិបាលរងស្រុកបារាយណ៏វិញ។
ឯកឧត្តម សុខ លូ អភិបាលខេត្តកំពង់ធំ មានប្រសាសន៏ថា ៖ស្រុកបារាយណ៍ គឺជាស្រុកមួយដែលមានកំណើនប្រជាជនច្រើនជាងស្រុកដទៃ ក្នុងចំណោមក្រុងស្រុកទំាង៨ ទន្ទឹមគ្នានេះឯកឧត្តម បានស្នើឲ្យគ្រប់គណបក្សនយោបាយទំាងអស់ចូលរួមបម្រើផលប្រយោជន៍ ជូនប្រជាពលរដ្ឋ សូមឲ្យមន្ត្រីទាំងអស់ត្រូវអនុវត្តន៍តាមតួនាទី ភារកិច្ច របស់ខ្លួនដោយមានការទទួលខុសត្រូវខ្ពស់ ត្រូវមានរបបប្រជុំការងារជាមួយមន្ត្រីក្រោមឱវាទឲ្យបានច្បាស់លាស់ ត្រូវខិតខំយកចិត្តទុកដាក់ពង្រឹងសាមគ្គីភាពឯកភាពផ្ទៃក្នុង ត្រូវពង្រឹងគុណភាព និងប្រសិទ្ធភាពនៃការផ្តល់សេវាសាធារណៈ ប្រកបដោយគុណភាពឲ្យបានឆាប់រហ័សដើម្បីឆ្លើយតបឲ្យទាន់ពេលវេលាទៅនឹងសេចក្តីត្រូវការដែលផ្តល់ភាពងាយស្រួលនិងមានការចូលរួមពីអ្នកប្រើប្រាស់សេវា សំដៅបម្រើប្រជាពលរដ្ឋឲ្យកាន់តែល្អប្រសើរឡើង ដើម្បីអភិវឌ្ឍន៍ប្រទេសជាតិឲ្យមានភាពរីកចម្រើន ជឿនលឿន ឲ្យបានឆាប់រហ័ស។
ថ្លែងក្នុងពិធីនេះ! ឯកឧត្តម ឈុន ឈន់ ប្រធានក្រុមប្រឹក្សាខេត្ត មានប្រសាសន៍ឡើងថា! សូមឲ្យមន្ត្រីទាំងអស់រៀបចំឥរិយាបថឲ្យបានសមរម្យ ថ្លែថ្នូរ និងបម្រើសេវាកម្មអត្តសញ្ញាណជូនប្រជាពលរដ្ឋឲ្យទាន់ពេលវេលា ជៀសវាងមានការរំាងស្ទះដោយប្រការណាមួយ ជាពិសេស រួមគ្នាអនុវត្តនូវគោលនយោបាយ ភូមិ ឃុំ មានសុវត្ថិភាព ទប់ស្កាត់កុំឲ្យមាននូវអំពើចោរកម្ម លួច ឆក់ ប្លន់ ជាដើម ដើម្បីឲ្យប្រជាពលរដ្ឋបានរស់នៅបានសុខដុមរម្យនា។ចំនែក
លោក សុទ្ធ ម៉ារី ដែលទើបតែប្រកាសឡើងកាន់តំណែង បានធ្វើការប្តេជ្ញាចិត្តថា អប់រំចិត្តឲ្យបានត្រឹមត្រូវ ប្រកាន់ភ្ជាប់នូវគុណធម៌ យុត្តិធម៌ សាមគ្គីភាព ឯកភាពផ្ទៃក្នុង ខិតខំរិះរកគ្រប់មធ្យោបាយ ដើម្បីបង្កើនការអភិវឌ្ឍប្រទេសជាតិ គោរពច្បាប់រដ្ឋធម្មនុញ្ញ និងអនុវត្តន៏តាមតួនាទីភារកិច្ច ការងារចាត់តំាង ការណែនាំរបស់ថ្នាក់លើ ប្តេជ្ញាបម្រើសេវាសាធារណៈជូនប្រជាពលរដ្ឋ៕

អភិបាលខេត្តអំពាវនាវអោយពលរដ្ឋពន្លឿនការផ្តល់សេវាជូនប្រជាពលរដ្ឋនិងអភិវឌ្ឍមូលដ្ឋាន