ពលរដ្ឋខ្មែរ២រូបត្រូវអាជ្ញាធរថៃបាញ់បណ្ដាលរបួសធ្ងន់ដោយចោទពីបទលួចឆ្លងដែនទៅលូចមាន់

 

ខេត្តបន្ទាយមានជ័យ៖ប្រជាពលរដ្ឋខ្មែរ២នាក់ត្រូវថៃបាញ់បណ្តាលរបួសធ្ងន់ហើយចោទថាឆ្លងដែនចូលទៅលួចមាន់កាល​ពីយប់ថ្ងៃទី១០ខែតុលាឆ្នាំ២០១៧ក្នុងទឹកដីថៃស្ថិតភូមិរ៉ាសុភីឃុំបោស្រុកខ្លងហាតខេត្តស្រះកែវប្រទេសថៃ។
លោកវរៈសេនីយ៍ត្រី តាំង សុខហេង មេបញ្ជាការកងរាជអាវុធហត្ថស្រុកម៉ាឡៃបានប្រាប់ថា៖ជរងគ្រោះដែលត្រូវបានថៃបាញ់បណ្តាលរបួស២នាក់មាន១.ឈ្មោះ រឿម រឹម ហៅង៉ោលភេទប្រុសអាយុ២៩ឆ្នាំ ២.ឈ្មោះ ស្រី ភក្តី ភេទប្រុសអាយុ២៩ឆ្នាំរស់នៅភូមិជាមួយគ្នានៅភូមិអូរល្វាឃុំបឹងបេងស្រុកម៉ាឡៃ។
លោកបានបញ្ជាក់ថា៖នៅវេលាម៉ោង៦ព្រឹកថ្ងៃទី១១ខែតុលាឆ្នាំ២០១៧នៅចំណុចភូមិរ៉ាសុភីឃុំបោស្រុកខ្លងហាតខេត្តស្រះ​កែវប្រទេសថៃឈមកម្ពុជាស្ថិតភូមិ.ឃុំជ្រៃសីមាស្រុកសំពៅលូនខេត្តបាត់ដំបងមានប្រជាពលរដ្ឋខ្មែរ២នាក់ត្រូវថៃបាញ់បណ្តាលរបួសធ្ងន់ខណៈពេលប្រជាពលរដ្ឋខ្មែរម្នាក់ឈ្មោះ ម៉ៅ ចន្ធី ភេទប្រុសអាយុ៣០ឆ្នាំរស់នៅភូមិភូមិអូរល្វាឃុំបឹងបេងស្រុកម៉ាឡៃ។
បានចូលទៅបេះម្ទេសអោយអោយថៅកែថៃបានប្រទះឃើញដេកដួលក្បែរចំការអំពៅដែលមានស្នាមរបួសដោយត្រូវគ្រាប់កាំភ្លើងហើយបានទៅរាយការណ៍ជូនដល់កម្លាំងយោធាឈុនខ្មៅថៃរួមជាមួយអាជ្ញាធរមកមើលហើយត្រូវបានយកជនរងគ្រោះទៅមន្ទីពេទ្យស្រុកខ្លងហាតខេត្តស្រះកែវប្រទេសថៃ។
លោកវរៈសេនីយ៍ត្រី តាំង សុខហេង បានបញ្ជាក់ថា៖ប្រជាពលរដ្ឋខ្មែរ២នាក់ដែលត្រូវថៃបាញ់បណ្តាលរបួសធ្ងន់ត្រូវភាគីថៃ​ចោទថាឆ្លងដែនចូលទៅទឹកថៃលួចមាន់ជល់ភូមិក្បែរព្រំដែនត្រូវបានប្រជាពលរដ្ឋថៃបាញ់បណ្តាលរបួសធ្ងន់នៅអំឡុងយប់ថ្ងៃទី១០ខែតុលាឆ្នាំ២០១៧ហើយពេលនេះត្រូវបានទាហ៊ានឈុតខ្មៅថៃនិងអាជ្ញាធរកំពុងសង្គ្រោះបន្ទាន់៕(ប៊ុន ធឿន)

 

ពលរដ្ឋខ្មែរ២រូបត្រូវអាជ្ញាធរថៃបាញ់បណ្ដាលរបួសធ្ងន់ដោយចោទពីបទលួចឆ្លងដែនទៅលូចមាន់

 

ក្រសួងសុខាភិបាលគ្រោងនឹងចងក្រងបណ្តាញអ្នកផ្ទុកមេរោគអេដស៍តាមភូមិនៅទូទាំងប្រទេស

ភ្នំពេញ៖ ក្រសួងសុខាភិបាលគ្រោងនឹងចងក្រងបណ្តាញអ្នកផ្ទុកមេរោគអេដស៍តាមភូមិនៅទូទាំងប្រទេសនៅចុងឆ្នាំនេះដើម្បីជួយដោះស្រាយរាល់ការលំបាកនៅក្នុងសហគមន៍របស់ពួកគេឲ្យកាន់តែប្រសើរឡើងថែមទៀត។
ថ្លែងប្រាប់ទូរទស្សន៍រស្មីហង្សមាសនៅព្រឹកថ្ងៃទី១១តុលានេះលោកវេជ្ជបណ្ឌិត លី ប៉េងស៊ុន ប្រធានមជ្ឈមណ្ឌលជាតិប្រយុទ្ធនឹងជំងឺអេដស៍សើរស្បែកនិងកាមរោគបានមានប្រសាសន៍ថាផែនការសកម្មភាពសហគមន៍ដែលនឹងបង្កើតនៅចុងឆ្នាំនេះនឹងជួយឲ្យអ្នកផ្ទុកមេរោគអេដស៍អាចជួយគ្នាបានទៅវិញទៅមកដូចជាបើកថ្នាំជំនួស ជំរុញឲ្យគ្រួសារមានផ្ទុកមេរោគអេដស៍ទៅធ្វើតេស្តឈាមនិងជួយតាមដានឃ្លាំមើលទៅលើការលេបឱសថប្រឆាំងនឹងមេរោគអេដស៍របស់អ្នកជំងឺអេដស៍ផងដែរ។
លោកវេជ្ជបណ្ឌិត ឈឹម សារ៉ាត់ នាយកប្រចាំតំបន់អាស៊ីរបស់អង្គការមូលនិធិថែទាំសុខភាពអ្នកជំងឺអេដស៍បានមានប្រសាសន៍នៅព្រឹកថ្ងៃទី១១តុលាដោយបង្ហាញការគាំទ្រចំពោះផែនការសកម្មភាពសហគមន៍របស់ក្រសួងសុខាភិបាលនេះដោយសារតែបានជួយឲ្យអ្នកផ្ទុកមេរោគអេដស៍នៅតាមសហគមន៍កាន់តែមានបណ្តាញរឹងមាំក្នុងការតស៊ូមតិនៅក្នុងសង្គមនិងជួយឲ្យអ្នកផ្ទុកមេរោគអេដស៍ចេះសាមគ្គីគ្នាផងដែរ។
តែយ៉ាងណាក៏ដោយលោកវេជ្ជបណ្ឌិតបានស្នើឲ្យក្រសួងសុខាភិបាលគួរតែយកបណ្តាញអ្នកផ្ទុកមេរោគអេដស៍និងជំងឺអេដស៍ដាក់បញ្ចូលទៅក្នុងផែនការសកម្មភាពសហគមន៍របស់ក្រសួងផងដោយសារតែបណ្តាញនេះក៏មានសកម្មភាពជួយដល់អ្នកផ្ទុកមេរោគអេដស៍នៅតាមសហគមន៍នានាផងដែរ។
គួរបញ្ជាក់ថាតាមការប៉ាន់ស្មានបច្ចុប្បន្ននេះមានអ្នករស់នៅជាមួយមេរោគអេដស៍ចំនួន៧២០០០នាក់ក្នុងនោះបានទទួលការព្យាបាលជំងឺដោយឱសថប្រឆាំងនឹងមេរោគអេដស៍ចំនួន៥៧០០០ស្មើនឹង៧៥ភាគរយ៕

អាជ្ញាធរស្រុកមង្គលបូរីប្រជុំដាក់វិធានការទប់ស្កាត់ពលរដ្ឋអោយបញ្ឈប់សង់សំណង់រំលោភចំណីផ្លូវជាតិលេខ៥និងផ្លូវរថយន្តភ្លើង

ខេត្តបន្ទាយមានជ័យ៖ថ្ងៃទី១១ខែតុលាឆ្នាំ២០១៧នៅសាលាស្រុកមង្គលបូរីអាជ្ញាធរស្រុកមង្គលបូរីបានដាក់វិធានការណ៍ទប់ស្កាត់ប្រជាពលរដ្ឋអោយបញ្ឈប់សង់សំណង់រំលោភចំណីផ្លូវជាតិលេខ៥និងផ្លូវរថភ្លើង។ 

លោក ពិន សេងហាប់ អភិបាលរងស្រុកមង្គលបូរីបានមានប្រសាសន៍ថា៖រាជរដ្ឋាភិបាលកម្ពុជាបានអភិវឌ្ឍន៍ផ្លូវជាតិលេខ៥ប្រភេទបួនគន្លូងរឺ៤ផ្លូវ២ទៅ២មកដែលកំពុងដំណើរការកសាងពីខេត្តបាត់ដំបងនិងខេត្តបន្ទាយមានជ័យហើយផ្លូវដែករឺផ្លូវរថភ្លើងដែលកំពុងកសាងរាល់ថ្ងៃពីក្រុងប៉ោយប៉ែតទៅបាត់ដំបង។
លោកបានបញ្ជាក់ថា៖ក្រោយពេលដែលរាជរដ្ឋាភិបាលកម្ពុជាក្រោមការដឹកនាំពីសម្តេចតេជោ ហ៊ុន សែន បានកំពុងអភិវឌ្ឍន៍ផ្លូវជាតិនិងផ្លូវដែកត្រូវបានដោះស្រាយផលប៉ះពាល់។ហើយជាស្តែងអាជ្ញាធរស្រុកឃុំសង្កាត់ត្រូវពិនិត្យមើលពីស្ថានភាពប្រជាពលរដ្ឋអោយបញ្ឈប់សកម្មភាពការលួចកសាងសង់សំណង់រំលោភចំណីផ្លូវ។ លោក ពិន សេងហាប់ បានណែនាំនិងដាក់វិធានការដល់អាជ្ញាធរមូលដ្ឋានមានភូមិ.ឃុំត្រូវទប់ស្កាត់អោយបានចំពោះប្រជាពលរដ្ឋដែលលួចកសាងសំណង់ថ្មីប៉ះពាល់ដល់ដំណើរកសាងផ្លូវជាតិលេខ៥និងផ្លូវដែករឺផ្លូវរថយន្តភ្លើងដែលកំពុងដំណើរ៕(ប៊ុន ធឿន)

 

ក្រុមហ៊ុន Smart Axiata នឹងក្លាយជាម្ចាស់ភាគហ៊ុនចំនួន៣០ភាគរយ លើក្រុមហ៊ុន Sabay

ភ្នំពេញ៖ ក្រុមហ៊ុន Smart Axiata នឹងក្លាយជាម្ចាស់ភាគហ៊ុនចំនួន៣០ភាគរយ លើក្រុមហ៊ុន Sabayជាផ្លូវការនៅឆ្នាំក្រោយ បន្ទាប់ពីក្រុមហ៊ុនទំាង២ប្រកាសចាប់ដៃគ្នាអភិវឌ្ឍឌីជីថលនៅកម្ពុជា។ 

ក្រុមហ៊ុន Smart Axiataបានចុះកិច្ចព្រមព្រៀងជាមួយក្រុមហ៊ុន Sabay កាលពីដើម សប្តាហ៍នេះដើម្បីពង្រឹងភាពនាំមុខគេផ្នែកឌីជីថល ផ្ដល់នូវការអភិវឌ្ឍប្រព័ន្ធបច្ចេកវិទ្យា ដល់ប្រជាជនកម្ពជា។ Smart Axiata នឹងបោះទុន លើផ្នែកអាជីវកម្មប្រព័ន្ធផ្សព្វផ្សាយឌីជីថល (Digital Media) ជាមួយក្រុមហ៊ុនដែលទើបបង្កើតថ្មីរបស់ Sabay ដែលមានឈ្មោះថា Sabay Digital Plus ហើយក្រោយពិធីចុះហត្ថការថ្ងៃនេះទៅ រយៈពេល ១ឆ្នាំ Smart Axiata នឹងបន្ថែមការវិនិយោគ ដើម្បីក្លាយជាម្ចាស់ភាគហ៊ុន ចំនួន ៣០% នៃក្រុមហ៊ុនថ្មីនេះ។
លោក Thomas Hundt នាយកប្រតិបត្តិក្រុមហ៊ុន Smart Axiata ថ្លែងថា៖ “ការវិនិយោគក្នុង Sabay នេះ គឺស្របគ្នាជាមួយនឹងយុទ្ធសាស្ត្ររបស់យើង ដើម្បីបំពេញតម្រូវការកាន់ច្រើនរបស់អ្នកប្រើប្រាស់អ៊ីនធឺណិតរបស់យើង។ ការរួមបញ្ចូលគ្នារវាងភាពនាំមុខគេផ្នែកអ៊ីនធឺណិតរបស់ Smart និង content ដ៏ចាប់អារម្មណ៍របស់ Sabay នឹងអនុញ្ញាតឲ្យយើងផ្ដល់នូវគំនិតជីវិតបែបស៊ីវិល័យកាន់តែសម្បូរបែប។ ការសហការនេះ គឺជាការច្របាច់បញ្ចូលគ្នាដ៏ស័ក្ដិសមបំផុតរវាងក្រុមហ៊ុនច្នៃប្រឌិតថ្មីបំផុតរបស់កម្ពុជាទាំងពីរ ដែលនឹងជួយឲ្យក្រុមហ៊ុនទាំងពីរលូតលាស់កាន់តែឆាប់រហ័ស។ ការវិនិយោគលើក្រុមហ៊ុន Sabay មិនត្រឹមតែជាការចាប់ដៃគូនោះទេ ថែមទាំងដើរតួ ជាគំរូដល់វិនិយោគិន និងសហគ្រិនផ្សេងៗទៀតលើអ្វីដែលជាឱកាសនៅក្នុងទីផ្សារយុវវ័យកម្ពុជា ជាមួយនឹងសក្ដានុពលដ៏អស្ចារ្យ។
យោងតាមលោក ជី សិលា បានឲ្យដឹងថា កម្ពុជា ជាប្រទេសវ័យក្មេង និងរីកចម្រើនឆាប់រហ័ស ដូច្នេះវិស័យឌីជីថល នឹងលូតលាស់ឆាប់រហ័សជាងការគិត។ នាយកប្រតិបត្តិ Sabay រូបនេះ បន្តថា ការសហការជាមួយ Smart នឹងជួយឲ្យក្រុមហ៊ុនទាំងពីរប្រើប្រាស់ភាពខ្លាំងរបស់ខ្លួនឲ្យអស់លទ្ធភាព រាប់ចាប់ពីអតិថិជន ដល់ បច្ចេកវិទ្យា ហើយនឹងធ្វើការក្នុងទស្សនវិស័យរួមគ្នាក្នុងការផ្ដល់នូវឌីជីថលដ៏ទំនើប និង lnternet of Things។ ការកិច្ចសហការនេះនឹងមានភាពយូរអង្វែង ហើយលទ្ធផលខ្លះ នឹងលើសពីការនឹកស្មាន៕

សភានឹងធ្វើវិសោធនកម្មច្បាប់ពាក់ព័ន្ធនឹងការបោះឆ្នោត ដើម្បយកអាសនៈរបស់គណបក្ស​ដែលត្រូវរំលាយទៅចែកឲ្យគណបក្សផ្សេងទៀត

ភ្នំពេញៈ រដ្ឋសភា នឹងប្រជុំពេញអង្គដើម្បីធ្វើវិសោធនកម្មច្បាប់ពាក់ព័ន្ធនឹងការបោះឆ្នោត ដើម្បីយក​អាសនៈ​​របស់គណបក្ស ដែល​ត្រូវរំលាយទៅ​ចែក​ឲ្យ​​គណបក្ស​​​ផ្សេងទៀត ដែលដោះស្រាយ​បញ្ហា​ក្រោយពេលគណបក្សនយោបាយណាមួយត្រូវបានក្រសួងមហាផ្ទៃលប់ឈ្មោះ។

ឯកឧត្តម ឡេង ប៉េងឡុង អ្នកនាំពាក្យរដ្ឋសភា បានឲ្យដឹងថា គណៈ​កម្មាធិការ​អចិន្រ្ដៃយ៍​នៅ​​ថ្ងៃ​ស្អែក​នេះ នឹងពិនិត្យលើសំណើសុំវិសោធនកម្មច្បាប់​បោះឆ្នោតចំនួន៤ ដែល​កំណត់​ពីការ​បែង​ចែកអាសនៈរបស់​​គណ​បក្សក្រោយពីរំលាយទៅឲ្យគណបក្ស​​​ដែលមានកូតាបន្ទាប់ តាម​​ការ​ស្នើ​របស់​​តំណាង​រាស្រ្ដ​៤៩​រូប មកពី​គណបក្ស​ប្រជា​ជនកម្ពុជា ដែលតំណាងដោយឯកឧត្តម ជាម យៀប និង​ឯកឧត្តម ប៉ែន បញ្ញា។

ក្នុងកិច្ចផ្តល់បទសម្ភាសន៍ដល់អ្នកសារព័ត៌មាននៅថ្ងៃទី១១ ខែតុលានេះ ឯកឧត្តម បានឲ្យដឹង​ថា ច្បាប់ដែលគ្រោងធ្វើ ការកែប្រែខ្លឹមសារនេះ មានច្បាប់ស្ដីពី​ការ​បោះឆ្នោត​ជ្រើស​តាំងតំណាងរាស្រ្ដ ច្បាប់​ស្ដីពីការបោះឆ្នោត​​ជ្រើស​តាំងព្រឹទ្ធសភា ច្បាប់ស្ដីពី​ការ​បោះ​ឆ្នោត​ជ្រើសរើសក្រុមប្រឹក្សារាជធានី ខេត្ត ក្រុង ស្រុកខណ្ឌ និងច្បាប់ស្ដីពីការបោះ​ឆ្នោត​ជ្រើស​រើស​​​ក្រុមប្រឹក្សាឃុំសង្កាត់។ ឯកឧត្តម បាន​បញ្ជាក់​ថា ការវិសោធនកម្មនៃច្បាប់ទាំងនេះមិនមានអ្វីជាឧបសគ្គនោះទេ។

 

​ ឯកឧត្តម ប៉ែន បញ្ញា ប្រធានគណៈកម្មការនីតិកម្ម និងយុត្តិធម៌ នៃរដ្ឋសភា បានឲ្យដឹងថា សំណើវិសោធនកម្មច្បាប់ទាំង៤នេះ គឺដើម្បីឲ្យមានភាពស្របគ្នាជាមួយនឹងច្បាប់ស្តីពីគណបក្ស នយោបាយ សំដៅធានានូវស្ថិរភាពនយោបាយ​ និងដើម្បីពន្លឿនដំណើរការនៃលទ្ធិប្រជាធិបតេយ្យ សេរី ពហុបក្ស តែប៉ុណ្ណោះ។

ទោះជាយ៉ាងនេះក្តី ឯកឧត្តម សុន ឆ័យ សមាជិក​រដ្ឋសភាមកពី​​គណ​បក្សសង្គ្រោះជាតិ បាន​លើក​ឡើងថា តំណាងរាស្ត្រមកពីគណបក្សនឹងមិនចូលរួមប្រជុំនោះទេ ខណៈរឿងក្តីសុំ​រលាយ​គណបក្សសង្គ្រោះជាតិកំពុងជាប់នៅតុលាការកំពូល។

យោងតាមមាត្រា១៣៨ស្ទួន នៃសេចក្តីព្រាងច្បាប់ស្តីពីវិសោធនកម្ម ច្បាប់ស្ដីពី​ការ​បោះឆ្នោត​ជ្រើស​​តាំងតំណាង​រាស្រ្ដ បានកំណត់ថា ក្នុងនីតិកាលនៃរដ្ឋសភា ប្រសិនបើមានគណបក្ស​នយោ​បាយ​​​ណាមួយ ត្រូវរំលាយ នោះចំនួនអាសនៈ​ របស់​​គណ​បក្ស​​នយោបាយដែលត្រូវ​បាន​រំលាយចេញ ទៅឲ្យគណបក្សនានា ដែលបានចូលរួម​​ក្នុង​​ការ​បោះឆ្នោត យ៉ាងយូរបំផុតត្រឹម​​រយៈពេល​៧ថ្ងៃ​៕

សភានឹងធ្វើវិសោធនកម្មច្បាប់ពាក់ព័ន្ធនឹងការបោះឆ្នោត ដើម្បយកអាសនៈរបស់គណបក្ស​ដែលត្រូវរំលាយទៅចែកឲ្យគណបក្សផ្សេងទៀត

ភ្ញៀវទេសចរណ៍បរទេសជិះកប៉ាល់មកកំសាន្តទស្សនាខេត្តកំពង់ឆ្នាំងមានការកើនឡើង

ខេត្តកំពង់ឆ្នាំង៖ ដោយសារខេត្តកំពង់ឆ្នាំងមានទេសភាពធម្មជាតិតាមដងទន្លេនៅក្នុងរដូវវស្សាគួរអោយគយ នៅខែតុលានេះ បានទាក់ទាញភ្ញៀវទេសចរណ៍បរទេសក្នុង១ថ្ងៃៗរាប់រយនាក់ បានជិះកប៉ាល់ចូលមកកំសាន្តនិងទស្សនាទីក្រុងកំពង់ឆ្នាំង ដែលធ្វើអោយស្បាយចិត្តរីរាយគ្រប់គ្នា ព្រោះតែពួកគាត់លក់ដូរទំនិញបានដាច់ច្រើន។

មន្ត្រីនគរបាលទេសចរណ៍ខេត្តកំពង់ឆ្នាំង ដែលឈរជើងប្រចាំការការពារសន្តិសុខនៅកំពង់ផែទេសចរណ៍ផ្សារក្រោម ក្នុងភូមិផ្សារឆ្នាំង សង្កាត់ផ្សារឆ្នាំង ក្រុងកំពង់ឆ្នាំង នៅព្រឹកថ្ងៃទី១២ ខែតុលា ឆ្នាំ២០១៧ នេះបាននិយាយអោយដឹងថា៖ នៅក្នុងថ្ងៃនេះក៏មិនខុសពីថ្ងៃមុនៗដែរ មានភ្ញៀវទេសចរណ៍បរទេសប្រមាណជាង២០០នាក់ ជាច្រើនក្រុមបានជិះកប៉ាល់មកឈប់ដើរលេងកំសាន្តតាមសួនច្បារមាត់ទន្លេ ដើរមើលនិងទិញទំនិញតាមទីប្រជុំជនផ្សារក្រោម និងផ្សារឆ្នាំង ។
ដោយឡែកភ្ញៀវមួយចំនួនទៀតបានជិះកាណូតទេសចរណ៍តូចៗ កំសាន្តមើលផ្ទះទឹកមើលបែចិញ្ចឹមត្រី មើលការនេសាទ និងមើលជីវភាពរស់នៅប្រជាពលរដ្ឋតាមដងទន្លេ នៅក្នុងសង្កាត់ផ្សារឆ្នាំង ។ វត្តមាននៃភ្ញៀវទេសចរណ៍បរ ទេសជារៀងរាល់ថ្ងៃខាងលើនេះ បានធ្វើអោយបងប្អូនប្រជាពលរដ្ឋជាអ្នកលក់ដូរទំនិញ នៅតាមទីប្រជុំជនរីករាយសប្បាចិត្ត ព្រោះតែពួយគាត់លក់ទំនិញដាច់បានច្រើន។
ទាក់ទងនិងកំណើនភ្ញៀវទេសចរណ៍ខាងលើនេះ លោក អេង ស្រស់វណ្ណះ អនុប្រធានមន្ទីរទេសចរណ៍ខេត្តកំពង់ឆ្នាំង បាននិយាយអោយដឹងថា៖ តាមរបាយការណ៍នៅក្នុងខែកញ្ញា មានភ្ញៀវទេសចរណ៍បរទេសតាមកប៉ាល់មកដើរកំសាន្តក្នុងខេត្ត ចំនួន១.១៩៨នាក់ បើប្រៀបធៀបនិងខែសីហា បានកើនឡើង២១៧នាក់ ស្មើនិង១៩% ។ ដោយឡែកភ្ញៀវទេសចរណ៍ជាតិ និងភ្ញៀវទេសចរណ៍បរទេស មកកំសាន្ត និងស្នាក់នៅតាមសណ្ឋាគារក្នុងខេត្ត នៅក្នុងខែកញ្ញាមាន ចំនួន ៧.៥៩៨នាក់។
លោកបានញ្ជាក់ទៀតថា៖ នៅក្នុងខេត្តកំពង់ឆ្នាំងមានតំបន់ទេសចរណ៍ចំនួន២១កន្លែង ក្នុងនោះមានតំបន់ទេសចរណ៍ប្រវត្តិសាស្ត្រចំនួន១០កន្លែង និងតំបន់ទេសចរណ៍ធម្មជាតិចំនួន១១កន្លែងផ្សេងទៀត។ ក្នុងនោះដែរក្នុងខេត្តក៏មានសណ្ឋាគារចំនួន៨កន្លែង(ថ្នាក់ផ្កាយ២មាន២កន្លែង) និងផ្ទះសំណាក់២៨កន្លែង សំរាប់ទទួលភ្ញៀវស្នាក់នៅ និងមានភោជនីយដ្ឋាន អាហារដ្ឋានចំនួន៣២កន្លែងទៀត សំរាប់បើរើសេវាកម្មម្ហូបអាហារ ជូនភ្ញៀវទេសចរណ៍ និងមានសេវាកម្មកំសាន្ត ការាអូខេ ឌីសស្កូតែក មួយចំនួនផងដែរ។
ទាក់ទងនិងវិស័យទេសចរណ៍នេះកន្លងមក លោកអភិបាលខេត្ត ក៏ធ្លាប់បានសំណូមពរដល់ម្ចាស់អាហារដ្ឋាន ផ្ទះសំណាក់ និងប្រជាពលរដ្ឋនៅក្នុងខេត្តទាំងអស់ សូមចូលរួមធ្វើអនាម័យដើម្បីបដិសណ្ឋាកិច្ចចំពោះភ្ញៀវ តាមទិសស្លាកទីក្រុងស្អាត រមណីដ្ឋានស្អាត សេវាល្អ នោះភ្ញៀវនឹងចូលចិត្ត ហើយជីវភាពយើងពិតជាធូរធា៕

ភ្ញៀវទេសចរណ៍បរទេសជិះកប៉ាល់មកកំសាន្តទស្សនាខេត្តកំពង់ឆ្នាំងមានការកើនឡើង

មន្រ្តីជំនាញកាំកុងត្រូលស្នើអោយអាជីវករ ចូលរួមសហការលុបបំបាត់ការប្រើសារធាតុគីមីលើអាហារ

ខេត្តព្រៃវែង ៖ មន្រ្តីជំនាញកាំកុងត្រូលសាខាខេត្តព្រៃវែង កាលពីវេលាម៉ោង៩ព្រឹក ថ្ងៃទី១១ព្រឹកម៉ិញនេះ បានសហការជាមួយមន្រ្តីមន្ទីរពាណិជ្ជកម្មខេត្ត ធ្វើការចុះត្រួតពិនិត្យគុណភាពទំនិញ នៅតាមតូបលក់ដូរជាច្រើនក្នុងផ្សារកអណ្តើក ព្រមទាំងស្តង់លក់គ្រឿងទេសនៅតាមខ្នងផ្ទះជុំវិញផ្សារកអណ្តើកជាច្រើនកន្លែងផងដែរ។

លោក អ៊ុត សុភាព ប្រធានកាំកុងត្រូលសាខាខេត្តព្រៃវែងបានអោយដឹងថា សកម្មភាពចុះត្រួតពិនិត្យនេះធ្វើឡើងក្នុងគោលបំណង ដើម្បីការពារសុខមាលភាពជូនប្រជាពលរដ្ឋ និងរួមចំណែកលើកស្ទួយសេដ្ឋកិច្ចជាតិផងដែរ។ ជាមួយគ្នានេះមន្រ្តីកាំកុងត្រូល បានធ្វើការពន្យល់ណែនាំ និងបង្ហាញដល់ក្រុមអាជីវករអំពីវិធីសាស្រ្តថែទាំ ការដាក់តាំងលក់ និងការរក្សាទុកមុខទំនិញអោយស្របទៅតាមលក្ខណ័ និងផ្តោតទៅលើអនាម័យផងដែរ ព្រមទាំងបានបង្រៀនក្រុមអាជីវករ និងប្រជាពលរដ្ឋ អំពីរបៀបមើលកាលបរិច្ឆេទនៃទំនិញ សំរាប់ជាគុណប្រយោជន៌ដល់សុខភាពរបស់អ្នកប្រើប្រាស់ទៀតផង។
ដោយឡែកសំរាប់ផ្សារកអណ្តើក នៅក្នុងពេលចុះត្រួតពិនិត្យនោះ មន្ត្រីជំនាញបានរកឃើញ និងដកហូតបានទំនិញហួសកាលបរិច្ឆេទជាច្រើនមុខដូចជា ទឹកក្រូចហ្វែនតា ( Fanta )ចំនួន៣៦០ដប ទឹកសាម៉ូរ៉ៃ១៥ដប ទឹកសណ្តែក២៣កំប៉ុង ទឹកខ្មេះ៤ដប ទឹកដោះគោខាប់៤កំប៉ុង ភេសជ្ជៈ Number one ២២ដប ទឹកសេរ៉ូរូបសេក៤ដប ស្រាបៀរ Black panter 9កំប៉ុង និងនំបំពងខូចគុណភាព១គីឡូក្រាមផងដែរ។ ប៉ុន្តែអ្វីដែលគួរអោយចាប់អារម្មណ៍នោះ គឺនៅពេលឃើញមន្ត្រីជំនាញកាំកុងត្រូលចុះពិនិត្យ មានអាជីវករលក់គ្រឿងទេសជាច្រើន បាននាំគ្នាបិទទ្វាតូប និងរត់ពួនបាត់អស់ ក្នុងចេតនាគេចវេសមិនអោយមន្ត្រីជំនាញត្រួតពិនិត្យនោះទេ។
ក្នុងករណីនេះ មន្ត្រីជំនាញកាំកុងត្រូលបានសំណូមពរដល់បងប្អូនក្រុមអាជីវករទាំងអស់ មេត្តាចូលរួមសហការជាមួយមន្ត្រីជំនាញផង ព្រោះការចុះពិនិត្យនេះមិនមែនចុះរឹបអូសដកហូត ធ្វើអោយខាតបង់ផលប្រយោជន៍បងប្អូននោះឡើយ ប៉ុន្តែផ្ទុយទៅវិញវាជាការ ការពារផលប្រយោជន៍បងប្អូនទៅវិញទេ ព្រោះវាមិនត្រឹមតែជួយថែរក្សាអតិថិជនរបស់បងប្អូនប៉ុណ្ណោះទេ ថែមទាំងជួយអោយបងប្អូនអាចគេចផុតពីការទទួលខុសត្រូវផ្នែកផ្លូវច្បាប់ ដោយសារតែការលក់ទំនិញខូចគុណភាពទៅអោយអ្នកប្រើប្រាស់ថែមទៀតផង។

ផ្ទុយទៅវិញបើបងប្អូនជាអាជីវករ នៅតែមិនចូលរួមសហការ នៅពេលមន្រ្តីជំនាញចុះមកពិនិត្យលើកក្រោយ រកឃើញមានដាក់លក់ទំនិញដែលច្បាប់ហាមឃាត់នោះ គឺមន្រ្តីជំនាញនិងចាត់វិធានការផ្លូវច្បាប់តែម្តង ដោយគ្មានការយោគយល់អ្វីឡើយ៕

 

រដ្ឋមន្រ្តីក្រសួងមហាផ្ទៃ គាំទ្រឲ្យមានការកំណែទម្រង់លើ​ការងារមន្រ្តីនគរបាល​កម្ពុជា

ភ្នំពេញ៖ សម្តេចក្រឡាហោម ស ខេង ឧបនាយករដ្ឋមន្រ្តី រដ្ឋមន្ដ្រីក្រសួងមហាផ្ទៃ​ បានគាំទ្រចំពោះវិធានការ​របស់​បណ្ឌិត្យសភានគរបាលជាតិ ក្នុងការពង្រឹង និងលើកកម្ពស់គុណភាពបណ្តុះបណ្តាល​មន្រ្តីនគរបាល​កម្ពុជា ដើម្បី​​​ធ្វើយ៉ាងណាឲ្យពួកគេមានសមត្ថភាពក្នុងការការពារសន្តិសុខ និងបម្រើប្រជាពលរដ្ឋ​នៅមូល​ដ្ឋាន​។

ក្នុងពិធីបិទវគ្គបណ្តុះបណ្តាលកម្រិតបឋមវិជ្ជាជីវៈនគរបាល និងប្រកាសតាំងស៊ប់ក្នុងក្របខ័ណ្ឌមន្រ្តី​នគរ​បាល​​ជាតិ​កម្ពុជា នៅព្រឹកថ្ងៃទី១១ តុលា នៅបណ្ឌិត្យសភានគរបាលកម្ពុជា​ សម្ដេចក្រឡាហោម​ ស​ ខេង​ បាន​​បញ្ជាក់ថា ការពង្រឹងគុណភាពនៃការបណ្តុះបណ្តាលនេះ គឺជារឿងដែលសំខាន់ពីព្រោះថាក្រសួង​ត្រូវ​ការមន្រ្តី​នគរបាលដែលមានសមត្ថភាពដើម្បីលើកកម្ពស់ប្រសិទ្ធិភាពការងារ។

ជាមួយគ្នានេះដែរ សម្តេចក្រឡហោម ក៏បានណែនាំដល់បណ្ឌិត្យសភានគរបាលកម្ពុជា ឲ្យបន្តសកម្មភាព​ដែល​មានស្រាប់ ដើម្បីលើកកម្ពស់គុណភាពបណ្តុះបណ្តាល ហើយគាំទ្រចំពោះកំណែទម្រង់លើ​ការងារ​សំខាន់ៗ ដើម្បីឈានទៅសម្រេចភារកិច្ច និងបេសកកម្មដ៏ពិសិដ្ឋ របស់ខ្លួនប្រកបដោយជោគជ័យ និងគាំទ្រ​ចំពោះចក្ខុវិស័យរបស់បណ្ឌិត្យសភានគរបាលកម្ពុជា ក្នុងការកសាង វប្បធម៌គុណភាពសម្រាប់យើងទាំង​អស់គ្នាផងដែរ។

ពាក់ព័ន្ធនឹងការជ្រើសរើសកងកម្លាំងនគរបាលវិញ សម្តេចក្រឡាហោម បានសង្កត់ធ្ងន់ថា ដើម្បីសម្រេចនូវ​គោលនយោបាយកំណែទម្រង់កងកម្លាំងប្រដាប់អាវុធរបស់ រាជរដ្ឋាភិបាល និងដោយយោងតាមស្ថានភាព នៃក្របខ័ណ្ឌមន្រ្តីនគរបាលជាតិមិនទាន់គ្រប់គ្រាន់ ក្រសួងមហាផ្ទៃបានដាក់ចេញនូវផែនការប្រចាំឆ្នាំ ក្នុង​ការ​ជ្រើសរើសមន្រ្តីនគរបាលថ្មី ដើម្បីបំពេញបន្ថែម និងបន្តវេន និងធានាបាននូវនិរន្តរភាព​នៃរដ្ឋបាល​សាធារ​ណៈ​ក្នុងការរក្សាសន្តិសុខ និងសណ្តាប់ធ្នាប់ជូនសង្គមជាតិ។

ឯកឧត្តមនាយឧត្តមសេនីយ៍​សេង ផល្លី ប្រធានបណ្ឌិត្យសភានគរបាលកម្ពុជា បានលើកឡើងថា ក្នុងឆ្នាំ​២០១៦​កន្លងទៅនេះ ក្រសួងមហាផ្ទៃ បានជ្រើសរើសមន្រ្តីនគរបាលក្របខ័ណ្ឌថ្មីមានចំនួនជាង៤ពាន់នាក់ តាម​រយៈការប្រឡងប្រជែង។

ឯកឧត្តមនាយឧត្តមសេនីយ៍ បានបន្តថា អ្នកប្រឡងជាប់ជាស្ថាពរទាំងអស់ ចាំបាច់ត្រូវតែឆ្លងកាត់វគ្គបណ្តុះ បណ្តាលកម្រិតបឋមវិជ្ជាជីវៈនគរបាល រយៈពេល៧៥ថ្ងៃ នៅបណ្ឌិត្យសភានគរបាលកម្ពុជា មុននឹងតាំងស៊ប់​និងមុនចេញទៅបម្រើការងារ​នៅ​តាមអង្គភាពនានាទូទាំងប្រទេស៕ 

ក្រសួងអប់រំ និងអង្គការភ្លែនអន្តរជាតិរួមគ្នាបំពេញក្តីស្រម៉ៃកុមារីក្នុងភាពជាអ្នកដឹកនាំ ក្នុងឱកាសអបអរសារទទិវាក្មេងស្រី​អន្តរជាតិ​

ភ្នំពេញ៖ ក្នុងឱកាសអបអរសារទទិវាក្មេងស្រី​អន្តរជាតិ​នៅថ្ងៃទី១១ ខែតុលានេះក្រសួងអប់រំយុវជន និងកីឡា អង្គការ​ភ្លែនអន្តរជាតិ និងក្រុម​ហ៊ុន​​ឯក​ជនបាន​បំពេ​​ញ​​​ក្តីស្រម៉ៃកុមារីកម្ពុជា​​បាន​​កាន់​​តួនាទី​​​​ជា​​រដ្ឋមន្ត្រី ប្រធានអង្គការ ព្រឹទ្ធ​បុរស​មាហាវិទ្យាល័យ​​និង​​នាយក​​​ក្រុមហ៊ុន​ដើម្បីជំរុញលើកទឹកចិត្ត​​ពួកគេឲ្យបំពេញបំណងឆ្ពោះ​​ទៅ​​​​​​​​​​ភាព​ជាអ្នកដឹកនាំ​​ទៅ​ថ្ងៃ​​អនា​គត។

ថ្លែងក្នុងកិច្ចប្រជុំឆ្លុះបញ្ជាំងស្តីពី កម្មវិធី «ខ្ញុំដើម្បីខ្ញុំ៖ ក្មេងស្រីក្នុងភាពជាអ្នកដឹកនាំ » នៅសណ្ឋាគាហីម៉ាវ៉ារី នាសៀល​ថ្ងៃទី​១០​តុលានេះ លោក យេនយេប ក្លែនរេនស៊ីង្គ នាយកប្រចាំប្រទេសនៃអង្គការភ្លែនអន្តរជាតិកម្ពុជាបានថ្លែងថា កម្មវិធី ខ្ញុំដើម្បី​ខ្ញុំបានជួយសម្រួលស្នើសុំទៅ​​ក្រសួងស្ថាប័នភាពាក់ព័ន្ធឲ្យស​​ហការជាមួយអង្គការភ្លែន​​ដើម្បីផ្តល់ឱកា​សឲ្យក្មេង​ស្រីម​ក​​ពីជនបទ​ដាច់ស្រយ៉ាលបានកាន់តំណែងជំនួយក្នុងរយៈពេលខ្លីតាមតួនាទីដែលពួកគេប្រាថ្នាចង់ធ្វើទៅ​ថ្ងៃអនាគត់​​ដូចជា តំណែ​ង​​​រដ្ឋមន្ត្រីក្រសួងអប់រំ នាយកក្រុមហ៊ុន ប្រធានអង្គការក្រៅរដ្ឋាភិបាល និងព្រឹទ្ធបុរសមហា​​វិទ្យាល័យជាដើម។
ឯកឧត្តម ហង់ជួន ណារុន រដ្ឋមន្ត្រីក្រសួងអប់រំ បានគាំទ្រចំពោះ​​កម្មវិធី “ខ្ញុំដើម្បីខ្ញុំ”​ដែលរៀប​​ចំឡើង​​ដោយ​​អង្គការ​​ភ្លែន​​​​អន្តរជាតិនេះ ព្រោះបានផ្តល់ឱកាសដល់កុមារីបានមកស្វែងយល់​​ពីការងារ​​សំខាន់ៗមួយចំនួនដែលពួក​​គេចង់​ធ្វើដើម្បី ​​​ត្រៀម​រៀបចំផែនការ និងរៀនសូត្រមុខវិជ្ជាណាសមស្របទៅនឹងតំណែងនីមួយៗ។
ឯកឧត្តមរដ្ឋមន្ត្រីក្រសួងអប់រំបានផ្តល់ឱកាសមួយថ្ងៃដល់កុមារីម្នាក់កាន់តួនាទីជារដ្ឋមន្ត្រីជំនួសមួយថ្ងៃ ដោយេឯកឧត្តម​​បាន​​ពន្យល់​​​​​​ពីតួនាទីរដ្ឋមន្ត្រី រចនាសម្ព័ន្ធក្រសួង ការដឹកនាំការប្រជុំ ការគ្រប់គ្រងបុគ្គលិក ការរៀបចំផែនការក្នុង​​លើកម្ពស់​​វិស័យ​​អប់រំ​​​ជាដើម។
ឯកឧត្តមបានផ្តល់បទពិសោធន៍ថា ដើម្បីអាចមានឱកាសកាន់តួនាទីជាអ្នកដឹកនាំយុវជន យុវនារីត្រូវពង្រឹងសមត្ថភាពខ្លួន​​ឯង​លើ​ជំនា​ញ​​បំនិតជីវិត ភាសា ព័ត៌មានវិទ្យា ការគិតពិចារណា ការដោះស្រាយបញ្ហាចំពោះមុខ ចេះអប់រំមិត្តភ័ក្ត ដឹកនាំផ្តួច​​ផ្តើម​​គំនិត​ជាដើម។ ជាមួយគ្នានោះក៏ត្រូវចេះត្រូវមានបទពិសោធន៍ការងារតាមជំនាញមានស្មារតីធ្វើការងារជាក្រុម និងការ​​ប្តេជ្ញា​​ចិត្តខ្ពស់ផងដែរ។
កញ្ញាចាន់ គី អាយុ១៨ឆ្នាំ នៅស្រុកអង្គជុំ ខេត្តសៀមរាប នាងចង់ក្លាយជារដ្ឋមន្ត្រីក្រសួងអប់រំ ដោយតាមរយៈ​​កម្មវិធី“ខ្ញុំដើម្បីខ្ញុំ កញ្ញាត្រូវបានរដ្ឋមន្ត្រីក្រសួងអប់រំអនុញ្ញាតិឲ្យធ្វើ ជារដ្ឋមន្ត្រីមួយថ្ងៃដើម្បីពេញក្តីស្រមៃរបស់នាង។ នាងលើក​​ឡើងថា បើទោះបីជាវាមិនទាន់ជាការពិតក៏ដោយ តែនាងបានបំពេញក្តីស្រមៃមួយរួចមកហើយ​ដោយធ្វើជារដ្ឋក្រសួង​​អប់រំ​​នៅ​​​​​ពេល​​នេះ។កញ្ញាបានប្តេជ្ញាខិតខំរៀនសូត្រឲ្យពួកកែដើម្បីក្លាយជារដ្ឋមន្ត្រីក្រសួងអប់រំពិតប្រាកដនៅថ្ងៃអនុគាត់ដើម្បីចូលរួមលើកកម្ពស់គុណភាពអប់រំនៅកម្ពុជាឲ្យរីកចំរើន។
សូមបញ្ជាក់ថា កម្មវិធី ខ្ញុំដើម្បីខ្ញុំ៖ ធ្វើឡើងដើម្បីជំរុញក្មេងស្រីនៅក្នុងតួនាទីជាអ្នកដឹកនាំ នៅប្រទេសកម្ពុជា ហើយ​​ធ្វើ​ឡើងទន្ទឹមគ្នាជាមួយកម្មវិធី “ក្មេងស្រីនៅក្នុងតួនាទីជាអ្នកដឹកនាំ” ៥០០ផ្សេងទៀត ក្នុងប្រទេសជាង៦០ ដើម្បីទាម​ទារឲ្យ​មាន​ការប្រឆាំងនឹងការរើសអើង ដែលរារាំងឱកាសរបស់ស្រ្តី និងក្មេងស្រី៕ 

ប្រាក់ឥន្ទទានប្រើប្រាស់ក្នុងសហគមន៍នេសាទ ត្រូវបានសប្បុរជនជនជាតិអាមេរិកជួយឧបត្ថម្ភបន្ត

ខេត្តកំពង់ឆ្នាំង៖ ឯកឧត្តម អេង ជាសាន្ត ប្រតិភូរាជរដ្ឋាភិបាលទទួលបន្ទុកប្រធានរដ្ឋបាលជលផល បានថ្លែងថាៈ សប្បុរសជនជនជាតិអាមេរិកគឺ លោក យ៉េ ហាស្ទីន តែងបានផ្តល់ប្រាក់ជំនួយដល់សហគមន៍នេ សាទ ក្នុងខេត្តកំពង់ឆ្នាំងជារៀងរាល់ឆ្នាំ ដែលគិតមកដល់ពេលនេះប្រាក់ដែលកំពុងប្រើប្រាស់នៅក្នុងការងារសហគមន៍មានចំនួនជាង៥៨លានរៀល ។
ឯកឧត្តមបានថ្លែងបែបនេះ កាលពីរសៀលថ្ងៃទី ១០ ខែតុលា ឆ្នាំ២០ ១៧ នៅក្នុងកិច្ចប្រជុំត្រួតពិនិត្យថវិកានៅក្នុងសហគមន៍នេសាទ និងពិភាក្សាការងារអំពីការអភិវឌ្ឍន៍របស់សហគមន៍ នៅក្នុងសាលាឃុំទឹកហូត ស្រុករលាប្អៀរ ដោយមានការចូលរួមពីសប្បុរជនជនជាតិអាមេរិកជាម្ចាស់ជំនួយ សាស្ត្រាចារ្យសកលវីទ្យាល័យតូក្យូ និងអ្នកស្រាវជ្រាវវិជ្ជាសាស្ត្រប្រទេសជប៉ុនផងដែរ ។
ឯកឧត្តមបានបន្តថាៈ ប្រាក់ឥន្ទទានដែលឧបត្ថម្ភដោយសប្បុរសជន ជនជាតិអាមេរិក ដល់សហគមន៍នេសាទជារៀងរាល់ឆ្នាំនេះ ក្នុងគោលបំណងអភិវឌ្ឍន៍សហគមន៍នេសាទអោយមានភាពប្រសើរឡើង កាត់បន្ថយបទល្មើសនេសាទ និងជួយជីវភាពរស់នៅរបស់សមាជិកនៅក្នុងសហគមន៍ផងដែរ ។
ជាមួយគ្នានេះដែរឯកឧត្តម សុំអោយសហគមន៍នេសាទដែលកំពុងដំណើរការប្រាក់ឥន្ទទាន របស់សប្បុរជន នេះត្រូវចាយវាយអោយចំគោលដៅ ដើម្បីប្រាក់ឥន្ទទានទាំងនេះ កាន់តែរីកចំរើនជាបន្តបន្ទាប់ និងមួយផ្នែកទៀតសម្រាប់ បំរើការងារសហគមន៍លើផ្នែកជលផល និងចុងក្រោយត្រូវតែបង្ក្រាបបទល្មើសដាក់ស្បៃមុង កុំអោយមាននៅក្នុងដែនសហគមន៍នេសាទរបស់ខ្លួន ដើម្បីបន្តនិរន្តរភាពត្រីអោយសំបូរសម្រាប់កូនចៅរបស់យើង។
លោក យ៉េ ហាស្ទីន សប្បុរសជនជនជាតិអមេរិក បានលើកឡើងថាៈ ថ្វីត្បិតតែកម្មវិធីផ្តល់ប្រាក់ជំនួយដល់សហគមន៍នេសាទនេះ មានខ្នាតតូចមែន តែបានជួយដល់ការងារជលផល និងជួយជាប្រាក់កម្ចីដល់សមាជិកក្នុងសមាគមន៍យកទៅប្រើប្រាស់បានធូរធាមួយកំរិតផងដែរ ។ ចំណែកប្រាក់ដែលបានផ្តល់ជូនស ហគមន៍ ថ្វីបើមិនត្រូវយកត្រឡប់មកវិញមែន តែសូមអោយប្រាក់ទាំងនេះ មានដំណើរការល្អនិងអោយចំទិសដៅ ដើម្បីអោយវិស័យជលផលមានភាពប្រសើរឡើងវិញ ។ ដោយឡែកកន្លងទៅសហគមន៍ខ្លះ បានមានកំណើនប្រាក់របស់សហគមន៍ប្រសើរឡើង និងបានសងប្រាក់ត្រឡប់មកវិញ យើងក៍បានយកប្រាក់នោះទៅឧបត្ថម្ភសហគមន៍ផ្សេងដើម្បីដំណើរការបន្តទៀត ។ .
សោម ភិរុណ នាយខណ្ឌ័រដ្ឋបាលជលផល ក្នុងឱកាសនោះបានរាយការណ៍អោយដឹងថាៈ បច្ចុប្បន្ន ខេត្តកំពង់ឆ្នាំងមានសហគមន៍នេសាទចំនួន៥៣ ក្នុងនោះសហគមន៍ចំនួន១០បានបញ្ចប់អាណត្តិ និងបានបោះឆ្នោតជ្រើសរើសគណៈកម្មការថ្មី ។ សហគមន៍នេសាទទាំងអស់នោះមានកន្លែងអភិរក្សត្រីមេពូជ ៣៦កន្លែង ស្មើនឹង១០២ហិកតា បានដាំព្រៃលិចទឹក១១ហិកតា ស្មើនឹងកូនឈើចំនួន៧.៧០០ដើម និងបានលែងមេពូជត្រីចំនួន៣០០គីឡូក្រាមចូលទន្លេនិងបឹងធម្មជាតិ។
ចំណែកថវិកាដែលកំពុងដំណើរក្នុងសហគមន៍នេសាទសរុបចំនួន៥៨.៤៧៨.៣៩១រៀល ក្នុងនោះថវិកាសប្បុរសជនមាន ចំនួន៥៤លានរៀល និងថវិកាបានមកពីអត្រាការប្រាក់មាន ចំនួន ១៣.៤៨៧.៣៩១រៀល ហើយនៅថ្ងៃនេះ លោក យ៉េ ហា ស្ទីន បានជួយឧបត្ថមប្រាក់បន្ថែមដល់សហគមន៍ ចំនួន៥លានរៀលថែមទៀត ៕